اول تاج



''تاج جميل جالى من شيمو صاحبه *مدونه shababek*
وبصراحه كونت مستنيه ..


- اسمك ؟؟

عمرو.

- سنك ؟؟

بالسنين والارقام 18 الا شويه

لو بالتجارب والخبره مش عارف ممكن ابقى كام .

- اسم مدونتك ؟؟

استغالات.

- مجال دراستك ؟؟

حاجات كتير اوى رغم ان سنى صغير ميوزك ولغه ايطالى ومعهد فنون مسرحيه

ودبلومه علم نفس من بلغاريا وطبعا كل دا انتساب وكورسات انما الدراسه الطبيعيه

اولى هندسه

- هل فكرت في اغلاق مدونتك ؟؟ والسبب ؟؟

اه فكرت مره من المرات انى اقفلها لانى كونت زهقت شويه وكونت بحس انو مفيش رد

على مواضيعى ساعتها بجد حسيت بالفشل بس رجعت تانى وقولت هكمل.



- ايه رد فعلك لو حد قل أدبه عليك في المدونه ؟؟

الطبيعى انى مردش عليه لانو اقل من انى ارد عليه وبمسح الكومنت ولا كأنى قريته اصلا

والكلام دا طبعا لو حصلت لانها لسه لحد دلوقتى محصلتش.


-أسوأ مدونه دخلتها ؟؟

المدونات اللى بتتكلم عن حاجات اقل من انها تتقرئ ويمكن المدونات دى اقل من انى كمان اقول اسمها .


-هايحصل ايه لأيميلك بعد ما تموت ؟؟

اكيد بعد فترا هيتمسح من عند كل الناس وهياخده اللى هيلقى الباص ورد بتاعه فى "my private box"

من اهلى وهيرجع تانى يشتغل عليه ويعمل add لناس و Ignore لناس .


- اديت الباسوورد لحد قبل كده ؟؟

اه واحد بس.

السفر بالنسبه لك ؟؟

تطلع ومعرفه واصدقاء لانو بقالوا فترا كبيره اوى فى حياتى كل شويه ياخدنى معاه فى رحله

جديده وغريبه يمكن ساعات مش ببقى عايز كدا او راضى لكن منكرش انى بستفيد.


- المود بتاعك ايه ؟؟

حاولت احدده معرفتش وكتير جربوا وفشلوا ساعات فى عز حزنى بضحك وساعات وانا بضحك

دموعى تخونى وتنزل منى غصب عنى.


بتعمل ايه في وقت فراغك ؟؟

بكتب ، العب كوره ، فيديو جيم ، اتفرج على فليم رعب، اقرئ شعر

ودا طبعا بيحصل وانا دماغى فى الف حاجه تانيه.


- بتحب تأكل ايه ؟؟

بيتزا وجمبرى و المكرونه الايطالى والرز واللوبيا وسفتاشى اكله صينى تحفه.


-الصفات اللي ورأثتها عن والدك ؟؟

العناد ،الذكاء،العصبيه،الهدوء وليس البرود.


-الصفات اللى ورأثتها عن والدتك؟؟

الطيبه ،الحب بدون مقابل ، ازاى تقدم الخير من غير ما تستنا رده

امتى تقول رايك وامتى يكون فعلا ليه صدى.


-اكتر 7 حاجات بتحبهم؟؟

- الجيتار صحبى وحبيبى انا وهو زى بعض بالظبط حاجه واحده تقريبا وبنحب بعض اوى

- جمع اى نوع من الشمع والنضارات الشمسيه من اى مكان فى العالم وباى تمن غالى او رخيص

-الكوره واتفرج على متشات المنتخب واعلق على كلام الناس بطريقه تضحكهم

- لما اصحى من النوم على صوت الناس اللى بتبيع وانزل القى طفل صغير بيضحك على الصبح

- لما القى حد قدامى حزين واقدر اخليه يضحك ودى بتبقى قمه سعدتى انى غيرت حال بنى ادم من حال لحال

ولا كانى خدت لقب افضل انسان فى الكون ببقى فرحان لدرجه مش عاديه

- انى اجمع زهره القرنفل لانها جميله اوى وشكلها وعطرها بيشدنى اوى اوى اوى

او انزل فى عز المطر وادور على نفسى والقيها بتغنى

- لما اروح ازور اغلى حد عندى فى قبره لانى بتمنى اكون فى يوم جنبه.....


- اكتر 7 حاجات بتكرهم ؟؟

-الكدب مع انى عملت كدا من فترا بس رجعت واتأسفت

-الخيانه واننا منحفظش على الامانه اذا كانت قلب او صداقه او حب

- اللؤم وانك تخبى اللى جواك عشان يبان انك غلبان وانت اصلا حوت

-الظلم وان حد يجئ عليك وانت مكنتش تتصور ان دا هو اللى هيظلمك

- لما ابقى وسط الناس وحاسس انى وحيد ومحدش سامعنى غير نفسى

- لما يكون حد معتمد عليا فى حاجه ومعرفش اعملها يعنى تقريبا لما بفشل

- لما القى حد كتب على مكان لسه مدهون جديد بحس انو ضيع مجهود ناس كتير ....


- شخصيتك بتشوفها ازاى انت واللى حواليك؟؟

بالنسبه للى حواليا بيقوله انى غامض و منهم اللى قال انى عندى قدرة اضحك الحجر

وابكى البهلوان وبالنسيه ليا كل ما القى عمرو يرجع يتوه منى تانى .


- ليه اقتحمت عالم التدوين؟؟

لو للدرجه دى مضيقكم ممكن انسحب

بس انا دخلت عشان احس انى عايش بتكلم واسمع رد على كلامى عشان يبقى ليا صوت ووجود

مش صفر على الشمال او كتاب مرمى فى مكتبة كتب ديكور بيجمل الشكل مش اكتر.


- احلى تعليق اتقال على مدونتك او فى موضوع عندك ؟؟

احلى تعليق كان من بنت قالت ليا "مش عارفه ادعى عليك ولا اقولك برافو انت خليتنى اعيط"

ساعتها بجد حسيت انى قدرت اوصل جوا القلوب وان كلامى محسوس مش مجرد تعليقات للمجامله .


- اهميه التعليقات ليك ايه ؟؟

مهمة جدا لان زى ما قالوا اللى سبقونا "من زرع حصد" انا كمان عن طريق التعليقات دى بحصد

حب ناس وبحس انى مجهودى مضعشى على الفاضى ودا بيخلينى ادور على الافضل .


- احلى بوست كتبته ؟؟ وايه سبب حبك ليه؟

احلى بوست كتبته كان "Answers without questions"

لانو لقى اكبر عدد من الردود عند الناس وتقريبا هو بدايه نجاحى فى التدوين...



- افضل مدونه قريتها؟؟

انا مش بفضل مدونه بعينها لكن فى كل مدونه بلقى شخصيه جديده اتعرف عليها

وكلام جديد بستفيد منوا وفكره اجدد بتعلم منها .


- اهميه الانترنت ليك ؟؟

لا خلاص مبقتش اقدر استغنى عنوا بقى جزء من حياتى تقريبا بيخلنى لسه عايش فى مصر

رغم انى بعيد عنها مسافات ومسافات بتفرج على كل جديد وكأنى لسه فى بيتنا الصغير .


- ايه هو السؤال اللى كان نفسك تتسأله ؟؟ وايه جوابه؟

كان نفسى اتسال ايه هى عيوبك

وكان جوابى وبصراحه

عنيد جدا، غيور على حد لكن مش من حد، شاكك، عصبى ، بدأ نوعا ما يتخللنى شعور بالغرور

ويا رب اقدر اتخلص منوا واقتلوا قبل ما يكبر وافقد السيطره عليه .


-اهداء التاج ؟؟

لاختى الجميله "simba.giral"

............

Egypt is not only home


ارمى حمولك عليا وانا اشيل عنك شويه
يا بلدى يا اغلى عندى من كل الدنيا دى




طبعا كلنا متابعين بنتفرج وحاسين شايفين ولادنا واخواتنا اللى اتهانوا واللى اداس على

كرامتهم شايفين ايد بتتمد بتستغيث بطلب النجده وتدعى من الموت تنجئ

مش عارف ابدا كلامى ولا اقول ايه غير انى بجد حزين ومخنوق ومجروح

مكسور نفسى ومهموم دموعى جوا عيونى لو نزلت هتحرق قلوب

زعلان على اخويا واختى وابويا وامى زعلان على عمى وخالى واهلى

زعلان عشان اداس على كرامتهم زعلان عشان انتهك حقهم زعلان على جروح مليئه اجسامهم

زعلان عشان سنين صبرى على اتحاد العرب نفذت وللاسف بيقل الامل مش بيزيد

زعلان من جوايا مكسور زى الورد لما يدبل فى عز النور

اسمحولى هتكلم من غير اى حواجز هقول كلام كتير جوايا لازم اقوله

هقول حقائق جوانا كلنا هتكلم بلسان مصرى عربى اصيل وهحاول اعبر عن صمت كل واحد

مننا حاسس بجرح جواه ومش هو بس لا دا كلنا

اولا هسال سؤال واقول يعنى ايه مصرى ؟


ويمكن هجاوب على احساسى وحبى لبلدى وازاى انا بحس يعنى ايه مصر

بالنسبه ليا عشان اعرف اقول كلامى واعرف الناس يعنى ايه مصرى


انا مصرى وبحب مصر عاشق ترابها اللى اجدادى خلدوه وجعلوه حبات دهب

عاشق طيبه اهلها ناس الطبيبن الل كل همهم بعد فقر السنين والتعب

لقمه حلال وراحه بال ضحكه خفيفه وامان

ناسها اللى وقت الشد بجد رجال ايد واحد ضد اى عدو او حد يفكر على كرامتنا يدوس

بجد شوراعها وحواريها بحب السهر على النيل والصلاه فى الحسين

كل سنه وانت طيب فى رمضان اللى بتطلع من القلب ومش محتاج قدامها مقابل

بحب خيرها اللى عمروا ما خلص ولا عمروا هيخلص

بحب اسمها اللى مذكور فى القراءن وبحب حديث النبى(ص)على جنودها

وعظمتهم وقوتهم

بحب الصباح اللى على صياح ديك وناس بتنزل شغلها وبتقول يا فتاح يا عليم يا رزاق

يا رزاق يا كريم بحب شاب بيمسك ايد راجل عجوز ويعديه شارع

ويقوله تحت امرك يابه

بحب طفل صغير بيلعب كوره فى قلب حاره حلمه

يروح يأكل لقمه بعد اللعب

بحب لمت اهلها فى استاد تشجع منتخب وايدينا مرفوعه بتقول يا رب

بحب فكاهه شعبها فى اصعب الاوقات بيطلع منو احلى النكت

شعب مبيعرفش الهزيمه ولا بينكسر مجد التأريخ وعلم الاجيال

ازاى للمجد يوصلوا

بحب كرامه للضيوف واى غريب كانوا صاحب مكان واخوك

حتى لو مختلف معانا فى الاديان بردو بيتكرم

بحب الهرم واسوان اسكندريه و وهى منوره عروسه فى ليله فرحها

.......بحب مصر .......


يمكن طولت فى الاجابه شويه بس دا عشان اللى هقوله بعد كدا جايز يجرح ناس

فكان لازم اعرفهم مين هى مصر


مصر اللى كانت سبب فى تحرير الجزائر نشيدهم الوطنى تلحين فنان مصرى

مصر اللى قصرت فى الاستعمار وقومته مصر اللى مدت ايديها للعرب

مصر اللى بدات فكره الاتحاد مصر اللى عشان نعلى ونبقى ايد واحده

عدت وعلى حاجات كتير اوى سكتت مصر اللى فيها حكومه وعائيه

وقياده فاهمه عارفه بتعمل ايه يمكن فيها اخطاء بس اكيد ليها كمان ايجابيات واكتر

كلمه هقوله ليك يا انسان يا عربى اعذرنى فيها لو ممكن تجرحك

اسمحلى اقولك عمرك ما هيبقى ليك هوايه فى الكون هتعيش

فى الرمل مدفون عمرك فى يوم ما هتتجمع وتعيش حر وانت جواك مكسور

وانت جواك نفوس ضعيفه لسه راضيه بالذل والهوان وانت جواك

ناس بتقول اخواتك ويمكن دول هما الد اعدائك

هتفضل طول عمرك مجهول الشخصيه يا عربى طول ما لسه بنغير من بعض

وبنيجى على كرامه بعض بنقول كلام وبنعمل عاكسوه

عمرك ما هتعيش يا عربى


كلمه لكل جزائرى فكر فى يوم انو بس يتكلم على مصر او يهين مواطن مصرى

"لا تاسفن على غدر الزمان لطالما رقصت على جثث الاسود كلاب

لا تحسبنها برقصها تعلو على اسيادها تبقا الاسود اسود والكلاب كلاب"

صعب انكم تبقى حتى ربعنا تبقوا واحد فى المليون جنبنا قدامكم كتير عشان

تفكروا بس تبقوا فى ربع حضارتنا او مجدنا




اسف عشان قولت كلام مينفعش يتقال فى مدونه اسف عشان قولت كلام جارح

اسف على كل حد هيقرئ كلامى بس قبل ما تزعل منى حط نفسك مكانى

Messages


(علاء مبارك) اول مره احس انك واحد بجد مننا ومكنش محتاجين نتهان عشان تحس بهمنا

(محمد فؤاد) انا معاك وحقى حقك وحق كل مصرى على راسى لحد ما يرجع ودموعك بجد غاليه

(الشاعر محمد سعيد) بجد كلامك حقيقى بيعبر عن كل مصرى وبيوصل للقلب بسرعه لانو اكيد طالع من حرقه

مصريه

Answers without questions




سألت نفسي كتير
مارستش يوم على بر
أنا اللي فيا الخير ولا اللي فيا الشر



زى كل يوم قعدت بليل لوحدى انا والعش الصغير اللى عايش فيه

قولت افتح الميل او الفيس واكلم اى حد يكون اون اهو يدينى امل انى لسه عايش

وعلى قيد الحياه وللاسف زى كل يوم ملقتش حد حتى اللى فاتح مشغول ومش فاضيلى

قولت خلاص يبقى اروح اجيب صديقى الودود صاحبى فى كتير من الوقت اللى

مهما قصرت فى حقو عمروا ما زعل منى وجريت عليه خدتوا بالحضن

وقولتوا وحشتينى اوى يا جيتارى وحشنى صوت اوتارك وحشنى كل مقطع

عزفتوا عليك وكل حفله وكل عيد ميلاد كونا مع بعض فيه كل لحن جديد

وكل نغمه عملت كلمه ورسمت ضحكه او دمعه على وجوه الناس

قولت اقعد بقى ادندن مع نفسى والعب اى اغنيه تيجى على بالى بقى

و اهو اى حاجه والسلام بس الاول اقوم اعمل النسكافيه عشان السهره تبقى احلى

المهم رجعت تانى والنسكافيه معايا وعمال ادور على حاجه اعزفها مش لاقى

اغانى بتيجى وفى ثانيه بتهرب منى و ذكريات نفسى تموت لقيتها لسه على بالى وعايشه جوايا

وحاجات دعيت فى يوم وانا بصلى انى انساها ولسه منستهاش

وفجاه النور قطع يمكن لاول مره مدورش على حاجه تنور او متفجئاش من اللى حصل

لان بجد حاولت انى امسك الجيتار فى اللحظه دى عشان انسى اللى فى بالى من اساله

واعزف اى حاجه تيجى بس كأنى اول مره امسك الجيتار و لا كانى درست

وتريات اصلا ولا حتى اعرف اى حاجه عن الموسيقى

لقيت نفسى بسرح من نفسى بيحصلى حاجه غريبه محصلتش قبل كدا

ونادر اوى لما تحصل لحد فينا لان دايما اللى بيحصل هو العكس

اللى حصلى انى لقيت اجابات من غير اسئله ايوه من غير اسئله

زى ما يكون السوال مش مهم الاهم جوايا الاجابه فى الاول خوفت من انى

اواجه نفسى يمكن عشان عارف انى اضعف من المواهه بينى وبين نفسى وعارف انى مش هقدر اجاوب

على كل الاسئله بس لما لقيت الاجابات هى اللى موجوده وملهاش اسئله خوفت اكتر

لا فى يوم ابقى انسان من غير ملامح مسخ موجود على الارض الاسم بشر

لكن مجهول الهويه


قولت هدور على سؤال لكل اجابه جوايا واللى مش هعرف اسال عليه

اكيد فى يوم هلقى ليه سؤال سالت نفسى كتير عشان اغطى بحر الاجابات والتطفل الداخلى

اللى جوايا زى ما يكون فى مسابقه اخلص من سؤال ادخل فى التانى وفرحان اوى وانا بواجه نفسى

لحد ما جه سؤال ندمت انى عرفت اجابتو ندمت لان الاجابه كانت "اه بحبها ونفسى ترجعلى "

كان نفسى بجد الانسانه دى انساها وكونت بخدع نفسى وبقول انا فعلا نسيتها

بس اول مره احس انها واحشنى ونفسى اقولها على حاجات كتير حصلت ليا فى بعدها

نفسى اعرف يا ترى بجد وحشتها و لا كان زمان حبها ودلوقتى خلاص

ومقدرتش اكمل بعد كدا قولت كفايه كدا عشان اكيد فى يوم تانى هلاقى اسئله

اكتر من كدا واكيد فى يوم هقعد نفس القعده دى بينى وبين نفسى كدا

وافضفض من نفسى لنفسى كدا

وعشان كدا

قررت من بعدها انى لا يمكن فى يوم اهرب تانى من مواجهه نفسى حتى لو

هبقى غلطان وقتها لان بجد استغربت ازاى قدرت اواجه نفسى

فى الظلام وخوفت من النور يمكن عشان كونت خايف من انى اشوف نفسى فى الموقف دا ؟؟؟

بس الحمد لله النور رجع تانى والنسكافيه برد والحياه كملت

والموضوع عدى بس كونت حابب اقولكم حاجه بجد شدتينى

ومن قلبى وجوايا حسيتها وخوفت منها فى لحظه من اللحظات