Beyond Tolerance



يا ريت اللى يقرئ البوست دا يقرئه لاخر سطر ويفهمه


طبعا كدبت لما قولت مش هقدر اغيب بس المره دى كان صعب ابقى معاكم

لانى جايز ساعتها كونت هخدعكم ومش هبقى معاكم بقلبى او بتفكيرى

المره دى كونت مع شخص غالى عليا اوى كونت مع شخص ادانى حياتو كلها باختياره

وبارادته ومن غير ما يفكر او حتى يتردد ثانيه

الشخص دا يعتبر هو سبب وجودى فى الدنيا بعد ربنا سبحانه وتعالى

الشخص دا هو والدى او زى ما بحب اقولها دايما بابا !


اه بعدت عشانو غبت لانو تعب اوى وكان لازم ابقى جنبو مش هنكر انى قولت انى مش ناوى اسامح تانى

لكن غصب عنى لقيت نفسى بسامحه على اى غلطه وعلى اى حاجه عملها ومش بلؤمه

خصوصا ان اخطائه زى اخطاء بقيت البشر بس يمكن انا كونت شايفها اكبر

وكونت كمان حاسس انى مبقتش بحس ناحيتو بالحب اللى المفروض

غصب عنى واجبارى احسو ناحيتو وكونت برفض باى شكل من الاشكال انو يتدخل فى حياتى

وحتى رايه كونت دايما باخده مجرد راى يعنى مش موثر اوى

ومش هنكر كمان انى اتمنيت كتير ان ربنا يفرقنى عنوا باى طريقه

ايوه باى طريقه اسافر او اهاجر او اموت او اى حاجه تبعدنى عنوا والسلام

كونت بحس ناحيتوا بحاله من النفور ومش عارف هقدر اسامح نفسى على دا كلو ولا لا ؟

اللى خلانى بقى اتغيرت ورجعت فى كلامى انى اول حد سامحتوا كان هو بابا

سامحتوا عشان حسيت انو اتكسر حسيت ان الجمل اللى شال حمل سنين ومشى بيه

وقع تعب مش قادر يكمل حسيت دا فى لحظه من وجهه نظرى انا غريبه اوى

حسيت دا فى المستشفى اول يوم ليه قبل ما يعمل عمليه ما فى القلب

وانا بوصله لقيت عنيه بتدمع قلقت اوى اتخضيت رغم انى كونت واخد الموضوع عادى

عمليه زى اى عمليه وزى كل مره هيخرج بعدها والحياه مستمره لا جديد يعنى

بس اول ما ظهرت دموعه حسيت اكتر من احساس يمكن مش هقدر اوصفهم لكن صدقونى

الاحاسيس دى لغبطتيتنى جدا يمكن انا لحد يوم العمليه معرفتش انام من كتر التفكير فى اللى حصلى دا

اتلغبطت لانى مكنتش متوقع انى بحبه للدرجه دى اتلغبطت عشان فى لحظه وبدون اى انذار

بقيت انا مكانوا وبقي مطلوب منى انى انا اللى ابقى مكانو حتى لو بشكل مؤقت احساس يخض ويرعب

اللى يرعب انى اتحطيت فى موقف انا عمرى ما عيشتوا قبل كدا لحظه مشوفتش نفسى فيها ولا شوفت اى حد قريب

منى فيها


...............................

وفضلت زى ما انا ما بين تفكير وخوف وقلق وترقب لحد ما جه يوم العمليه اللى بعتبره من

اهم ايام حياتى هحاول اوصفلكم الموقف عشان تعيشوا اللحظه دى زى بالظبط

بابا خلاص اتحضر انو يدخل غرفه العمليات وخلاص قربت ساعه الحسم يعنى مفيش هزار

ولا اى همسه حتى ورق الشجر مش مسموح له انو يتحرك عشان ميعملش اى نوع من القلق

جوا قلوب خايفه ومستنيه تعرف ايه النتيجه

وطبعا انا ماشى جنبو و هو على السرير وحاسس بوجود دموع فى عنيه مش قادره تنزل

ماشى جنب السرير وهو بيتحرك واحساس بيدخل جوا قلبى يرعبنى اكتر دقات قلبى بتزيد

والخوف بيدق فى كل ضلوعى ركزت اوى فى ملامح وشه وارتحت شويه

لما ابتسم ليا وبعدها بدقيقه بالظبط لمحت وشى انا فى مرايه من مرايات المستشفى

فى الاول استغربت لانى لقيت نفسى متغير اوى ملامح وشى متغيره

زى ما يكون كبرت اوى فى يومين باين على ملامحى العجز وقله الحيله والضعف

بصيت لبابا وقولته تخرج بالسلامه وسبته وخرجت من المستشفى لحد ما يعدى وقت العمليه

وجريت على العربيه جبت منها علبه السجاير وشربت اول سيجاره

والتانيه التالته وكل دا وانا مش عارف انا بحلم ولا انا عايش اللحظه دى بجد

لما قعدت افكر شويه لقيت انو مكنش يستحق منى كل البعد اللى كونت ببعده عنو حتى لو

هو ابعد حد عنى يمكن كان مستنينى انا اقرب وغصب عنى لقيت دموعى بتنزل منى

دخلت جوا العربيه لانى مبحبش دموعى تبان قدام اى حد

وخصوصا انها مينفعش تبان قدام اخواتى لان المفروض انا اكتر حد فيهم

متامسك وبدات بقى اغسل وشى وافوق تانى وكأن مفيش حاجه

ورجعت المستشفى وكانت مفأجاة ليا ان المستشفى رفضت تعمل العمليه عشان مش هتنجح

ولازم يعمل عمليه اكبر شويه بس هى دى اللى هتريحه اكتر

اطمنت شويه وبدات دقات قلبى فى السكون وارتاحت ملامحى وبدات افوق تانى

و اول لما بابا خرج بدات اتكلم معاه عادى واهزر وكأنى عمرى ما زعلت منوا

وبدات بقى اسال الشغل ماشى ازاى عشان اقدر امشيه فى الفترا اللى هو تعبان فيها

واعمل اى حاجه حتى لو بسيطه بس احس انى شيلت من عليه ولو جزء صغير

وبعد ما فهمت حبت حاجات وعكيت فى حبت حاجات اكتشفت انو

كان زى النحل شغال علطول وتعبان وقرفان وعرفت انا قد ايه كونت ظلموا

انا من يومين بس فى الشغل زهقت واتحرق دمى و مليت

يا ترى هو بقى حاله كان بيبقى عامل ازاى ؟

بس بسرعه قررت انى اكمل لحد ما هو يقوم ويقف على رجليه يمكن شويه بعدت

عن الدراسه لكن هرجعلها ان شاء الله اول ما بابا يبدا يرجع تانى وسطنا لانو بجد

زى الشمعه فى عز الليل بتنور وبتدى بريق ولامعا غير عادى وغير دا كلو

بتحسسنى بالامان

انا مستنى بقى دعوتكم عشان العمليه التانيه قربت وانا بجد خايف اكتر من الاول

وبجد شكرا ليكم على انكم كونتوا سبب فى انى ارجع عن اكبر غلطه كونت هعملها

و هى انى ابطل اسامح او ارفض السماح

لان مع اول تجربه صعبه قبلتينى عرفت معناها وقيمتها





* بعيد عن البوست

* اتاكدت بجد ان عمر صحبى من اخلص الناس ليا واكتر الناس اللى بتحبينى وبتخاف على مصالحتى ومستقبلى



* الناس اللى كانت بتتكلم عليا فى غيابى بجد مش زعلان منكم نهائى لان قد ما بتكلمه بلاقى اكتر

منكم ناس بتحبينى



* استفزينى اوى ان اسرائيل مستاءه من مسلسل تركى بيصور حربها على فلسطين بطريقه وحشيه

وبيحرض العرب على قطع العلاقات معاها !!!

واستفزينى اكتر ان قناه mbc بتعلن استمراها فى عرض المسلسل رغم اى ضغوط وكأن هو دا

اللى هيجبلنا حقنا او هى دى بقت اساليب المقاومه الحديثه !!!


* على فكره السجايره دى مرحله وهتعدى ان شاء الله ومحدش يزعل منى وان شاء الله

هتعدى بسرعه



*الغرور ولا بيزيد ولا بيقل ومش لقى ليه علاج ناس بتقول دى ثقه مش غرور وانا بتمنى

اتخلص من الاحساس دا مهما كان اسمو بس مش عارف !



..........................................


28 التعليقات:

الزهرة البرية (Joudy) يقول...

مش عارفة أعلق وأقولك لأنى أنا كمان الفترة اللى فاتت مريت بظروف أصعب إن شاء الله مش تمر بيها وولأسف حذفت مدوانتى بس لما رجعت حبيت أشوف الناس اللى كنت بتابعها من مكانى الجديد

بس أرجع وأقولك إنى بالفعل جربت الاحساس ده بس مع عمى هو مش نفور على أد ماهو كان تقصير للأسف مش فوقت إلا بعد فوات الأوان بجد سعيدة إنك لحقت الوقت وإن شاء الله ربنا يسفى باباك ويبارك لك فيه ويحفظه وما يحرمك منه أبدا يارب وإن شاء الله يفضل منور حياتك وتفضلوا حواليه

تحياتى لإحساس إبن مخلص دون مجاملة

دمت بكل الخير والسعادة

Joudy

لــــ زهــــــراء ــــولا يقول...

عمرو

-*-*
ربنا يعفو عن والدك ويكرمه ويفرح قلبه وان شاء الله يتعافى ويكون فى اسلم صحه وحال
ده تعليق صغير وان شاء الله لى عوده للكلام معاك لان وحشنى الكلام معاك اوى اوى انت بجد اخ جميل ....

زهراء

جوجو يقول...

السلام عليكم
اخبارك؟ الف مليون سلامة على والدك ربنا يطمنك عليه ان شاء الله يقوم بالسلامة ربنا يخليك ليك ويخليه ليك

تحياتى

Unknown يقول...

احم احم
مش عارف اقولك ايه انت كلامك مؤثر بدرجة كبيرة قوي
خصوصا انك جيت علي حته حساسه فيا قوي
وهي الاب
بما ان والدي اقرب حد ليا بجد بحبه بدرجة كبيرة جدا
واتمني كل الناس ما تتحرمش من نعمة الاب بجد
بتمناله الشفا باذن الله وربنا يطمنكو عليه
وانا معرفش ازاي انت كنت زعلان من والدك
عشان الفكرة دي مرفوضة اصلا
اكيد هو مهما يعمل لازم تستحمل وتفتكر فضله عليك
وتفتكر كلام ربنا انه وصي بالوالدين كتير قوي
عشان كده بقولك خليك جنبه وادعيله
وان شاء الله يقوم من تاني ويبقي وسطكو

riri يقول...

الاول اكيد نورتنى تانى
كانت غايبه طويله بس الحمد لله رجعت تانى
ربنا يارب يقويك ويقوم وباباك بسلامه يارب
فى حاجات بتخلنى نبعد عن اللى مننا بس اول مايتوجعوا بنتوجع معهم وبنلاقى نفسنا بنحب حب كان مستخبى جوانا
انا مرت عليا فتره زى كده وكنت مستغربه زيك كده وكنت حاسه ان جوايا تناقض فظيع من حب وخوف اوووى على ااقرب حد ليا ومن حاجه انا كنت معتبرها بش موجوده فى حياتى
ربنا يارب يقوملك باباك بسلامه
وترجع انت كمان تكتب

مرايتى يقول...

أولا أسأل الله العظيم رب العرش العظيم أن يشفى أبيك شفاءا لا يغادر سقما ومرضا المسلمين

قريت كل كلمه كتبتها حسيت فعلا إننا كتير بنبقى فاهمين حد غلط أو مزودين زعلنا منه بس هو فعلا ما بيبقاش كده

وكمان إتأكدت إن حتى فى النقمه أو الضيق معاها حكم ربانيه لينا بس إلى يفهمها
يعنى محن بس هى فى الأصل منح يعنى تعب باباك قربك ليه وخلاك تسامحه وقرب ما بينكم وكمان خلاك تتحمل مسؤليه جديده خلاك تغير فكرك عن التسامح نتائج كتير أكيد أنت الوحيد الى حاسس بيها

ربنا يكرمك يارب ويشرح صدرك ويقويك ويهديك ويتوب عليك يارب من السجاير أنت وكل شباب المسلمين

نهر الحب يقول...

السلام عليكم بعد الغياب الطويل
اولاً الف سلامة علي والدك وان شاء الله ربنا يشفيه ويقوم لنا بالسلامة

ثانياً
بصراحة مريت بالموقف ده مع انه ممكن ميكونش بالعمق ده
بس احيانا بنوصل لدرجة لنحس ان اهلنا متقلين العيار علينا اوي
بس لما بنفكر بعقل بنعرف انه مجرد خوف وحب منهم

انا كان فيه واحد زميلنا في الكليه كان ديما يقوللي نفس احساسك ده لحد ما والده قلبه تعب وكان لازم يعمل عملية قلب مفتوح
ساعتها ولاول مرة لقيته بيبكي وبيندم فعلا علي كل لحظة كان من جواه قاسي علي والده

سعيدة ان فيه حاجة فوقتك في الوقت المناسب ومش بعد فوات الاوان

يا رب تكون بخير ديماً
:)))

سكرة يقول...

الف سلامه على والدك يا عمرو وان شاء الله يقوم بالسلامه ويرجع ينور حياتك كلها من تانى .
بتمنالك ربنا يوفقك وتكون قد المسئوليه ان شاءالله

just waiting يقول...

انا مش هقولك غير حمدالله على سلامة باباك مقدما لأنه هيقوم بالسلامه ان شاء الله واكيد دا خير بإذن الله متقلقش

shoshta_ joker يقول...

السلام عليكم....

عمور والله عارفه انك دايما بترجع فى كلامك وبرده حتبعد ومش حصدق كلامك المردى انك مش حتبعد تان الا اما تنفذ باه



والحمدلله انك قربت وعرفت حقيقة مكنتش واخد بالك منها او ممكن تعرفها لو الطروف دى مش حاصلت


والحمدلله برده انك عرفت ان السجاير مرحلة ويارب تعدى ان شاء الله

ويارب متغيبش زى ما بتقول


دومت بخي فى رعاية الله
shemo

lostlove يقول...

ربنا يقومه بالف سلامه
والحمد لله انك عرفت تسامح
ولقيت ده جواك
ربنا يوفقك ويسعدك
وي ولدك يقوم بالف سلامه

تحياتي
اتمني التوفيق

اقصوصه يقول...

الله يشفي والدك ويعافيه يا رب

ناس كثير فحياتنا ما نحس بقيمتهم

الا بعد ما نحس بخطر فقدهم :)

miroooo يقول...

ربنا يشفى والدك ان شاء الله يا عمرو
احساس جميل اللى حسيته ان شاء الله والدك هيرجع زى الاول واحسن
متاسفه انها جت متاخر بس غصب عنى والله
ترجع لنا بالف سلامه
والف سلامه على والدك
يارب تكون بخير دايما انت واسرتك

غير معرف يقول...

عمرو .. ده مهما كان باباك ..
يعني مهما بعدتوا .. مهما حصلت خلافات ومشاكل .. هتفضل انت ابنه مهما حصل ..
ابنه يعني حته منه .. يعني مهما تكابر وتظهر انك زعلان وعايز تبعد ونفسك متبقاش معاه الا انك مع اول موقف فيه اختبار حقيقي هتلاقي ان كل اللي كنت حاسس بيه دي مجرد مشاعر مزيفه ، وساعتها بس المشاعر الصادقه اللي جواك هي اللي هتسيطر عليك .. وهو ده اللي حصل .. :)

اهم حاجه تحاول متاخدش قرار في لحظة عصبيه لانه اكيد هيبقي غلط ..

وفعلا المواقف الصعبه اللي زي دي هي اللي بتعرفنا مين الصاحب اللي بجد ومين الصلصال ..

المهم
ربنا يقوم باباك بألف سلامه .. ابقي طمننا ببوست جديد ..

تحياتي

amirelhob يقول...

الزهرة البرية

اتمنى انى اشوفك تانى تعلقيتك وتكتبى فى

مدوناتك من جديد وربنا يكرمك فى حياتك

وميسى ليكى انك حياتنى على احساس كان

غايب عنى فا ليست بقصيره

ومن قلبى بتمنلك كل خير وسعاده وصحه وتوفيق وفرح وابتسامه تدوم يا ب طول العمر

واسف على التاخير فى الرد

amirelhob يقول...

زهراء

استنيت تعليقك كتير لكن اتاخر اكتر ما

ما انا اتاخرت لكن مش مشكله اكيد عندك

ظروف هى السبب اتمنى تكونى بخير

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

amirelhob يقول...

جوجو

لله يسلمك يا قم والحمد لله قم بالسلامه وميرسى على سؤالك

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

amirelhob يقول...

انسان عادي

كلامك صح جدا واسف على انى جيت على الجرح

بس هى الحقيقه كدا دايما صعبه وبتوجع

وميرسى على دوعاءك ومن قلبى بتمنلك كل خير

وسعاده وصحه وتوفيق وفرح وابتسامه تدوم

يا رب طول العمر

amirelhob يقول...

riri

حمد لله على السلامه ومعليش انا بقى اللى غبت فترا كبيره كان لازم اغيب فيها

وربنا يطنك دايما يا قمر ويوفقك
ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

amirelhob يقول...

مرايتى

لو دورت على اجمل كومنت فى المدونه اكيد

هيبقى ليكى خايف اختار كومنت ليكى

اظلم التانى بجد متشكر على كلامك و خبرتك

و اقتراحاتك ودعاءك اللى بيبقوا جنبى

فى كتير من الوقت

من قلبى بتمنلك كل خير وسعاده وصحه و

توفيق وفرح وابتسامه تدوم يا رب طول العمر

amirelhob يقول...

نهر الحب

ميرسى ليكى يا نهر على الكومنت الجميل دا

وميرسى كمان انك فكرتينى بحاجات كتير لازم

اعملها وربنا يشفى اموات المسلمين اجمعين

ومره تانى ميرسى ليكى ومن قلبى بتمنلك كل

خير وسعاده وصحه وتوفيق وفرح وابتسامه تدوم يا رب طول العمر

amirelhob يقول...

سكرة

ميرسى على الدعاء اللى ربنا استجاب ليه دا

وميرسى على سؤلك ون قلبى بتمنلك كل خير وسعاده

وصحه وتوفيق وفرح وابتسامه تدوم يا رب طول العمر

amirelhob يقول...

Just waiting

الله يسلمك وميرسى على توقعك الجميل اللى

طلع صائب الحمد لله

ومن قلبى بتمنلك كل خير وسعده وصحه وتوفيق

وفرح وابتسامه تدوم يا رب طول العمر

amirelhob يقول...

shemo
للاسف طلع كلامك صح وغبت ويمكن كمان رحلت

لكن زى ما وعدتك بردو رجعت تانى وسطكم

بيتى الصغير

بتمنى انك متزعليش

ومن قلبى بتمنلك كل خير وسعده وصحه وتوفيق

وفرح وابتسامه تدوم يا رب طول العمر

amirelhob يقول...

lostlove

ميرسى على كلامك والحمد لله على كل حاجه

ومن قلبى بتمنلك كل خير وسعاده وصحه وتوفيق

وفرح وابتسامه تدوم يا رب طول العمر

amirelhob يقول...

اقصوصه

عندك حق فعلا بنحس بقيمتهم متاخر

ومن قلبى بتمنلك كل خير وسعاده وصحه وتوفيق

وفرح وابتسامه تدوم يا رب طول العمر

amirelhob يقول...

miroooo

ولا يهمك مش متاخره اوى ينى انا اللى ردى

هو اللى جه متاخر

على العموم ميرسى على الكومنت دا ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

amirelhob يقول...

ђager ZaǮbal

عندك حق الصاحب اللى بجد بيبان وقت الشده

وبيبان مين اللى يعرف ياخد قرار صح او غلط

واسف بجد على التاخير فى الرد على الكومنت

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر