Decision

طبعا لو بدات بالاعتذار هتبقى موضه قديمه اوى وكلام كدا ملوش لازمه ومتكرر

والكلام لما بيتكرر مبيبقاش ليه لازمه وبيبقى تقيل كمان

انا هقولكم انى بس كونت مشغول الفترا للى فاتت زيكم فى الامتحانات

والحمد لله عدت على خير وربنا سترها معايا

هبدا البوست الجديد دا بالكلام عن حاجات كتير اوى كانت جوايا الفترا اللى فاتت

بس كان غصب عنى لازم اعديها ومش اديها اهميه لحد ما تعدى الفترا اللى محتاجه منى

تركيز مش عادى حتى لو كان دا غصب عنى

اول حاجه عملتها بعد ما خلصت امتحانات غيرت شكلى عشان احس بتغير كبير فى حياتى

على الاقل لما ابص لنفسى فى المرايا احس انى واحد تانى

غير اللى عاش فترات حزن وخوف ورعب من اللى عدى وفات

حتى لو دا تغير بسيط بس على الاقل تغير

مش هقول انى مخسرتش الفترا اللى فاتت حاجات كتير

اصدقاء واحلام واحاسيس ومعانى حاجات كتير كان نفسى اكمل عمرى بيها

بس بردو الرصيد اللى كسبتوا من الدنيا كافى اوى انو يعلمنى ازاى اقدر

اشوف الحقيقيه من غير تشويش اشوف الابيض ابيض والاسود اسود

انسى اللون الرمادى اللى عقدنى كتير وكان هيضيع منى حاجات اكتر من اللى خسرتها

بس الحمد لله فوقت من اللى انا فيه قبل ما اصحى على الم يزود همى

الفترا اللى فاتت دى كانت من اجمل الايام فى حياتى

اصلها عارفتنى ازاى ابقى كبير وسط الكبار لا ومش بس كدا لا اخد مكان وسطهم يخليهم

يحترمه راى

احساس جميل انك تتحرر من قيود الطفوله و الضعف ومش معنى كلامى ان الطفوله شئ وحش

بس بردو ساعات كتير اوى وفى مواجهات كتير متنفعش تبقى صغير

لازم تاخد قرارت تحدد حياتك مينفعش تعتمد على حد لازم تختار طريقك عشان

متلومش غير نفسك ومتديش لنفسك فرصه انها تلقى شماعه تعلق عليها اى فشل ممكن تتعرضله

الاحساس الاصعب بقى انك تختار فى يوم ومن غير اى مقدمات انك تبقى لوحدك

ومش عايز معاك بنى ادمين عايز تسرح فى حياك تغلط وتصلح غلطتك بنفسك

تتحمل مسؤليتك يمكن هتغلط وهتحتاج مساعدات بس مش هتبقى هى العامل الاساسى فى حياتك

وكمان هتكون تدخلات بارداتك مش فرض عليك

مش حاجه خناقك ومحسساك انك ولا حاجه

اه طبعا فى ناس بتتدخل عشان تساعد ومش عايزه مقابل بس هى متعرفش انها بتهد اكتر ما بتبنى

وعشان ابدا اكون صح واختار حياتى صح خدت كل القرارت بنفسى ومن غير اى

تراجع خدت قرار انى انسى الماضى بكل ما فيه الحلو قبل المر الابتسامات قبل الدموع

وكانى لسه جاى الدنيا من جديد ومليش حد فيها نهائى اه فى ناس بحبهم وعايز افضل معاهم واكيد

هفضل معاهم وهطلب رايهم بس القرار هيبقى ليا انا

اكيد فى حاجات كتير مش هعرف اخد فيها قرارت لوحدى وهقع لكن هقوم تانى بسرعه

بناس كتير حواليا بيحبونى زيكم وزى اصدقاء ليا لسه بيهمهم مصلحتى

انا دعيت واتمنيت انجح وحاسس انى ان شاء الله انى مش هفشل

حتى لو انكسرت مش هتبقى بالدرجه اللى تخلينى ارجع عن قرارى

وعشان كدا بدات احضر لرجوعى مصر تانى قريب

بس بعد ما اخلص حاجات كتير ورايا عشان مبقاش شايل هم اى فشل بدرى

لان اللى بيفقد دفاتر الماضى لا يمكن يلاقى اقلام يسطر بيها دفاتر تسجل الحاضر

* اوعدكم الفترا اللى جايه هكتب بوستات كتير جدا تعوض غيابى الايام اللى فاتت *

*انا متوقع ان دا هيبقى اقل موضوع عليه تعليقات اتكتب فى المدونه لانو مش واضح اوى وكمان ميهمش حد اوى*

* علمت ان عيون الناس تعكس دائما الحقيقيه فارتديت نظاره النفاق حتى لا اجرح احد*