خير اللهم اجعله خير




يا احلى اسم فى الوجود يا مصر...... يا اغلى اسم يا مصر
نعيش لمصر ونموت لمصر .....مصر مصر تحيا مصر



اكيد كلكم بتسالوا ايه اللى انا عاملو دا وايه اللى جاب النشيد دا هنا
بس دا طبعا عشان اعرفكم انى وطنى وبحب البلد اوى اكتر من اى حد فيكم
لكن اللى بجد عاجبنى الايام دى انى سمعت خبر كدا ويا رب يطلع صح عشان انا
من المؤيدين ليه اخر حاجه
الخبر دا بيقول ان فخامه" الرئيس محمد حسنى مبارك" ناوى يرشح نفسو تانى
لفترا رئاسه جديده وانا طبعا مع الخير دا جدا ولو هو قال لا انا ممكن مبقاش مصرى بعد كدا
لان دايما لا يصح الا الصحيح بس فى حاجه دائما كونت بسمعها فى البرامج بتاعت الحزب الوطنى ومش
عارف يا ترى حقيقى فعلا ولا مجرد دعايه وشو اعلامى ليس اكتر
والحاجه دى بتقول ايه بقى ان الشباب هو مستقبل البلاد وهم حماه الامه
وحبت كلام كبير كدا مش بفهموا اوى يعنى بس اللى كونت بحسوا ان الشباب دول تقريبا يعنى اللى هو
احنا الجيل اللى طالع يعنى ان وانتى وانت واخوك واختك الناس اللى فى السن دا تقريبا كدا
ودا كان بيخلنى بينى وبينكم عندى امل ان البلد ممكن احوالها تتغير للاحسن بس بعد ما سمعت الخبر الجميل دا
اتلغبطت ومبقتش عارف هو ايه اللى بيحصل ومين مع مين وفين وليه ؟
ازاى يقولوا ان البلد مستقبلها فى الشباب واحنا كل الوزارء عندنا عاملين عمليات تجميل
وبيلعبوا فى الوقت بدل الضائع وسلموا نمر من زمان ويدوبك المسئول بيبقى هيموت قبل ما يبقى
وزير واول ما يبقى وزير بسم الله ما شاء الله تدب فيه الروح وكانوا عندو عشرين سنه
ومش ناقص غير يتفرج على هيفاء وروبى
طيب ازاى بيقولوا الشباب هما عماد الامه ومعندناش اى مسئول اقل من 40 سنه
ولا هما يقصدوا ان المنصب هو اللى بيجدد للمسئولين شبابهم!!!

وطبعا يا جماعه عشان انا عندى اخوات واهل خايف عليهم مقدرش اقول اكترمن كدا لاحسن
اروح اصيف زى الاستاذ "ايمن نور" ويتقال عنى بلاوى ومحدش فيكم هينفعنى بصراحه
لما يقعدونى على الكرسى بالمشقلب ويتعمل فيا زى ما حصل فى مسرحيه الزعيم
ويقولولى مواطن شريف مع مواطن شريف واخ مع اخوه وبعد كدا بتقلب
بالقوات تتقدم
انا طبعا بحب مصر وبحب الحكومه اللى مش بتغلط اى غلطه وفاهمه كل حاجه
واحنا ظلمنها معانا ومطلعين عيناها وبردو مستحملنا
وطبعا مش اقصد خالص فى الموضوع دا ان الرئيس كبر لا اطلاقا خالص
رئيسنا زى الفل وشباب وعندو قدره يلف استاد القاهره عشرين مره وربنا يزيدو ويجعلوا عامر




* لو مكتبتش موضوعات تانى امانه عليكم العيش والحلاوه وتسالوا على اهلى *

4 التعليقات:

غير معرف يقول...

هههههههههه خليى بالك من نفسك واوعى تلبخ فى الحكومة دة الشرطة فى خدمة الشعب مع حبى غرام

amirelhob يقول...

يا رب الحكومه مش تقرئ الموضوع دا خالص عشان نفسى اعيش انا عندى ولاد وبجرى عليهم وبجرى بسرعه جدا كمان ونفسى اعيش دانا حتى بحب الحكومه
وميرسى يا قمر على التعليق الجميل دا ومن قلبى بجد بتمنلكم كل خير وسعاده وصحه وتوفيق وفرح وابتسامه تدوم يا رب طول العمر

lostlove يقول...

هههههههههههههههه عمور بتلعب انته كده مع الكبار بس معلم واللهي في كلامك ربنا يخلي الحكومه والريس والوزراء وكل الشعب وكل المقيمن بل خارج مع مرعاه فروق الوتيقت وبعيدن الي عاوز في الجيل بتعنا يكون وزير خليه يبقي وزير بيئه ههههههههههه اصل احنا جيل بيئه علي رايهم جيل مش فاهم حاجه وكلامك ده بجد بياكد اننا جيل ضايع ربنا يستر علينا وعليك ويجعل كلمنا خفيف عليهم هههههههههههههههه لحسن يعملو فينا زي المسرحيه وانا اخري الم وهقول انته ساكن فين ههههههههههههههه ربنا يوفقك يا جميل واستمر بقي بس بعدين عن اخواتنا الي بالي بالك

amirelhob يقول...

الم وتقولى انا ساكن فين !
واضح انك اصيله اوى وبنت حلال مصفى اهو دا اللى كونت خايف منو حد يبلغ عنى بس متخافيش انا قدها وقدود انا ليا عمى شغال فراش فى وزراه التعليم يعنى وسطه
ههههههههههههه وميرسى يا قمر علبى الكومنت الجميل اوى دا
ومن قلبى بجد بتمنكلم كل خير وسعاده وصحه وتوفيق وفرح وابتسامه تدوم يا رب طول العمر