عولمه يا سيدى


طبعا كلكم شايفين الصوره دى ومستغربين ليه انا حاطط الصوره دى وايه موضوعها
انا هقولكم واحده واحده عشان بجد اللى بيحصل دا حاجه تغيظ


اولا دا كان اعلان قديم زمان عن كريم للبشره كان سهل اوى وبسيط
ومش مكلف ولا فيه اى حاجه تخدش الحياء ولا من قريب ولا من بعيد
عكس الحال دلوقتى اعلانات مغرقه التلفزيون والجرايد وكل شويه تتكرر
ووصل الحال ان شركه محمول كبيره عملت اعلانتها فى رمضان على كل قناه
وقبل المسلسل وبعد المسلسل وقبل البرنامج وبعد البرنامج وكل دا طبعا انا ملقيش انى
اعترض عليه لان دى استثمارات انا بس اللى ضيقنى انها عشان تعمل اعلانتها
استخدمت اغانى من زمان الفن الجميل وغيرت كلماتها وحطط عليها كلمات
داعيه للشركه ودا طبعا مش فى اى غلط من الناحيه القانونيه لكن انا
عايز اسال ليه نغير فى ثوابت جميله واغانى وفن لا يمكن يتكرر تانى
يمكن دا هيكسبنا اه بس مينفعش نبدى مصلحتنا على تاريخنا وتاريخ جيل
ادى للفن اصول يمشى عليها ودا طبعا غير اعلانات اللى بتتكلم عن كريمات البشره
ويجيبوا ناس شبه عريانه عشان يبان ان الكريم دا احسن كريم فى السوق
وغير اعلانات الحبوب اللى بالى بالكم وحامد يرجع جامد وغير اللى تعمل كمان على
موسيقه الاغنيه الرائعه "خلى السلاح صاحى" وبقى الموضوع مصلحتى اولا لدرجه
ان كمان الهئيات الحكوميه كمان بدات تعمل اعلانات لنفسها زى اعلانات
هئيه السكك الحديديه ومصلحه الضرائب والباقيه تاتى وكل دا لان الاعلام
لقى ان الناس بدات عقولها تخف وتتابع الاعلانات بطريقه غير عاديه
وبدانا نشوف مصطلحات وحاجات خارجه عن اللى اتربينا عليه عشان
الاعلان يشد المشاهد يعنى حتت موزه حلوه شاب امور يسحر البنات
ووصل الحال ان كمان الممثلين بدوا يعملوا سلسله اعلانات لمنتج ما زى
الفنان "مصطفى شعبان" وشركه ليون
والفنان " احمد السقا" وشركه شيبسى وغيرهم كتير كمان زى المطربين
الكبار امثال "عمرو دياب" و " تامر حسنى"

والسوال اللى نفسى اساله يا ترى حجم النجم بيفرق فى الاعلان
يعنى لو نجم ليه شعبيه كبيره وليه زى نجوم الكوره والغناء والتمثيل دا هيفرق مع المشاهد بجد
او هيفرق مع الفنان نفسو من حيث الجماهيريه بتاعتو هتقل او هتزيد
او حتى هتفرق معاه كتير فى الدخل ويا ترى الفنان بيهمه المنتج او نوعه
او حتى بيتكلم عن ايه ولا هى مجرد سبوبه وخلاص واهى الحياه
اكل عيش واللى يعرف يعمل حاجه يعملها
ولا الموضوع استعراض عضلات مين اللى هيعرف يعمل اعلانات اكتر
ويا ترى الفنانين خلاص مبقاش يكفيهم المبلغ اللى بيقبضوه من اى عمل
وعشان كدا بيحاولا يزيودا دخلهم عن طريق اى اعلان والسلام
ولا هو الموضوع بقى سمك لبن تمر هندى ؟؟!


طيب يا ترى خلاص لازم يبقى فى فى كل قناه اعلانات عشان تكسب
ولازم كمان الاعلانات كل مدى تزداد اثاره و تشويق من حيث المناظر
الساخنه او من حيث النجوم او من حيث الامكانيات ؟؟!

كل دى اساله لو حد فيكم لقى ليها حل يا ريت يقولى يمكن انا اكون غلطان فى حاجه

4 التعليقات:

غير معرف يقول...

اكيد الاعلانات دي مش اساءه للفن لان دي اعمال عمرنا ما هنغير راينا فيها وان حد يستعين بيها دا بيدل انها اعمال محبوبه
واكيد ان اي حد هيدور علي اي حاجه تزود نسبه نجاحه وطالما الاعلان اللي عمله مش فيه ضرر لحد يبقي عادي ان يعمله

amirelhob يقول...

انا معاكى مليون الميه لكن ليه نخلط المكسب بجيل ادى للفن اعظم فترا ممكن يكون فيها فن ليه ناخد اغانى جميله عشان تبقى مجرد دعايه عل منتجات جايز مهما فى حياتنا لكن متستحقش اننا عشان نعلن عنها نستهتار بتاريخ او بفن جيل عظيم وفنانين كابر زى
"عبد الحليم" "سعاد حسنى" وغير من المثلين الكبار

غير معرف يقول...

موضوع جامد وتسلم ايدك على المجهود الرائع يا فنان وبجد انت زى اسامه منير وكلامك معقول وجميل وبجد بتفهم ويا ريت تقول سنك عشان نعرف انت كم سنه يا مان

ranim يقول...

دي بقيت حاجه مقرفة اكتر حاجه بكرهاا في حياتي كلها الاعلانات فن ايه يا عمرو اللي هيخدوا بالهم منه بقينا انانين اووووووي واهم حاجه في حياة كل واحد فيهم نفسه والباقي بيقولهم في وشهم بصوت عالي طظ فيكم طبعا لاما فنان كبير او ممثل كبير يعمل اعلان وليه شعبية كيرة المفروض يعني ان المنتج اللي بيعلنوا عنه بيبقي اكثر استخداما +ان الفنان ده كل ما كان له شعبية اكتر بياخد فلوس اكتر وطبعا بالنسبة له يا بلاش اطلع في اعلان مدة مش هتكمل 10 دقائق واخد فلوس قد كده حلوة الموضوع وفعلا موضوع الاعلانات دي بيستفزني اوي
تحياتي طبعا ليك وللمدونة
مبتسمة دائما