توبه انى اركب تاكسى تانى


كونت تعبان حبتين زى اى بنى ادم عادى يعنى قولت
اخد تاكسى واروح بدل ما استنى الميكروباص او ما بدل ما اركب المترو
وبينى وبينكم خايف من الانفلونزا وانتوا طبعا عارفين
الناس بيبقى شكلها ازاى فى الاتوبيسات والمترو
وبدات الحكايه كالتى:

"بدايه مؤلمه"
قعدت ساعه اشاور عشان تاكسى يقف ليا ومحدش معبرنى
بوحه لما قعد يقول المدبح ساعه ومحدش وقفه ليه
واول ما قال الهرم وقف ليه اكتر من 10 تاكسيات
المهم قولت يا رب اكرمنى بتاكسى
وفعلا ربنا استجاب ليا وبعتلى تاكسى مش قد كدا
بس اهو يادئ الغرض المهم ببوص للسواق
لقيتو راجل عجوز قولت زى بعضو اهو مشوار
ويعدى

"مكنتش اتصور"

وكالعاده طبعا الراجل بيحاول يفتح موضوع
عشان يعنى السكه متبقاش طويله وخاصه انو الكاسيت بايظ
وحصل اللى هقوله دا بالحرف


انت بتدرس يا بنى ؟

اه انا فى الجامعه ودى اول سنه ليا

وناوى تشتغل هنا ولا برا مصر ؟

يعنى ربنا يكرم ولو ملقناش فرصه هنا ندور عليها برا

طيب بابا شغال ايه ؟

لا بابا مسافر وشغال برا

ااه طيب بابا شغال ايه برا يا ميدو ؟

محاسب

صحيح هو اسم البطل بتاعنا ايه ؟

عمرو

عشت الاسامى يا عموره وربنا يوفقك يا حبيبى
قوليلى يا عموره هو انت بتسافر لبابا؟

اه طبعا بروح له كل اجازه كدا عشان اشوفه

انت عندك اخوات يا عمرو؟

اه عندى اخوات اكبر واصغر منى

ربنا يخلهملك وقاعيدن هنا ولا مسافرين عند بابا؟

لا بنسافر كلنا مع بعض فى اخر السنه
ـ ـ ـ ـ ـ ـ ـ ـ ـ ـ ـ ـ ـ
كل دا واحنا لسه واقفين فى اول اشاره تقبلنا
قولت اولع سيجاره لان الراجل دا حرق دم
وتطفله خنقنى وفتحت الاشاره ومشينا
ورجع تانى السواق يمارس تطلفه ويسال من اول وجديد




صحيح يا عمرو هو بابا مسافر فين؟

السعوديه

اه ربنا يرجعوا بالسلامه ومسافر بقالو قد ايه؟

بقالوا فترا يعنى

ـ ـ ـ ـ ـ ـ ـ ـ
وبدات اتنرفز ويبان على وشئ
انى قرفت من الرغى الكتير وملبت
من كتر الاساله


هو انت اهلاوى ولا زملكاوى ؟

زملكاوى و من غير تريقه

ههههههه ربنا يكون فى عونك
بس بجد بقالكم فترا متبهدلين
وصعبانين عليا والله

هاهاها معلش بقى فترا وتعدى ولكل جواد كبوه


لا بس طولت اوى معقول كم سنه متخدوش غير
بطوله واحده وتتغلبوا من طوب الارض
فاكر ال 6\1


معلش بقى بس ممكن حضرتك توقف على جنب

ليه دا لسه بدرى


لا معلش اصلى افتكرت حاجه فى الشارع دا
كونت ناسيها

_"_"_"_"_"_"_"_"_"_"_"_"_



وطبعا مقدرتش استحمل تطفله اكتر من كدا
ونزلت وقعدت اسال نفسى
هو ليه السواقين دايما يسالوه بابا شغال ايه
ويا ترى دا ليه علاقه بدفع الاجره
يعنى مثلا لو بابا موظف هتفرق عن لو بابا
مدير بنك مع ان المشوار واحد؟

طيب ليه دايما لما نكشر فى وش السواق
يغير الكلام ويتكلم فى الكوره او اى حاجه هايفه ؟

وليه دايما الطرق عندنا زحمه ؟

وليه الزمالك دايما كاسفنا ؟

وليه دايما كل السواقين بيطلعوا اهلاويه؟

طيب ليه وانت نازل من التاكسى
مبتقاش عايز تسيب السواق
وحاسس انو قريبك وفى عشره عمر
ما بينكم وانو بقى قريب ليك
من ناس كتير وتحس انو فى الفه بينكم؟

3 التعليقات:

البرنس احمد وغرام يقول...

بجد الموضوع مزهل وانا كمان مش هركب تاكسى تانى اشكرك لهتمامك بالموضوع

amirelhob يقول...

للاسف دا مش حل لان كدا هنوقف حال الغلابه بس ممكن اول ما نركب نقولهم لو سمحت حضرتك ممكن بلاش كلام عشان مصدع ولو هو معندوش دم ممكن ننزل وناخد اى تاكسى تانى وبجد ومن قلبى بتمنلكم كل خير وسعاده وصحه وتوفيق وفرح وابتسامه تدوم يا رب طول العمر

ranim يقول...
أزال المؤلف هذا التعليق.