البوسه دى بتاعت مين ؟


"حمام الهنا"

طبعا كل اللى شاف عنوان الموضوع دا قال دا شكلو واد
مش متربى وقليل الادب لكن والله دا عنوان موجود فى حياتنا كتير
وخاصه واحنا صغيرين وانا بقيت بستعجب منو اوى لما كبرت
اولا واحنا صغيرين وشكلنا نضيف كدا ولسه واخدين دوش
وتيجى خارج من الحمام تلقى بابا او ماما بيقولك
البوسه دى بتاعت مين ؟
وياه بقى لو تيته او جدو عندكم
او عمو ومراتو او خالتك وجوزها
اللى دايما يحشر نفسو فى كل حاجه
وهو اصلا ثانوى صنايع ومعاه دبلوم
وطبعا زى الهبل نجرى عشان نلحق البوسه
قبل ما حد ياخدها مننا والمشكله بقى
لو انت او انتى ملكمش اخوات اصلا
بيبقى شكلك وحش اوى لما تكبر وتفتكر
اللى كان بيحصل!

"سوال مؤدب"

طيب وليه بطلوا يبوسنى لما كبرت؟
ولا يعنى عشان بقيت بغل كبير طيب ليه بطالو
يسالونى عامل ايه او ليه دايما مبقاش يقولوا
ليا غير كلمه ذاكر ذاكر زى ما يكون انا
كل سنه بسقط !!!!

"سلم على عمو بوس يا ولا"

طيب ليه دايما مفروض علينا كل اللى
يسلم علينا نبوسه وياه بقى لو عندوا انفلونزا
او واخد دور برد لسه طازه وهوبا تقوم واخدو منوا
وياه بقى ويبقى حظك من السما بقى لو عندوا الوباء
الجديد دانتا تبقى ابن حلال مصفى اخر حاجه
وتبقى الحجه داعيلك قبل ما تنزل


"اتوبيس مضر بالصحه"


طيب دا البوس وعرفناه تعال بقى شوف
المصيبه الاكبر لما تبقى قاعد فى الاتوبيس وتلاقى
كل الاتوبيس عمال يعطس فى وش بعض
وكأن دا دليل على المحبه يعنى
لا واللذيذ بقى ان كل الاتوبيس بيرد
يقولك "يرحمكم الله" وكأنك انت اللى
بتعطس بس وعلى اساس انك انت بس
اللى هتعديهم !!


"خزعبلات علاجيه"



الطريف بجد بقى فى الشعب المصرى انك
تلقى عند كل شخص طريقه ذكيه عشان
تعالج المرض لو جالك واعشاب طبعيه غريبه
تسمع عنها وكأن الشعب كلو خريج كليه طب
طيب اما الشعب كلو عندو علاج اومال مين
اللى خايفين ؟؟؟
لا واللى يقولك هو الفول النابت العلاج
او يقولك العدس وطبعا بنستغرب!!
طب ودا ايه دخلوا فى الانفلونزا
تسمع بقى مبررات وحاجات غريبه
تبقى عارف انها كدب بس غصب عنك
لازم تصدقها والا هتشوف العين الحمرا


بس دا كلو جاى من بوسه انت تبوس
عمو وجدو وتيته ويبقى عندهم المرض
وتنقلوا لنص مصر يا ضنايا
جدو يبوس ومصر تتعب!

7 التعليقات:

vip.mr.heroo يقول...

السلام عليكم ورحمت الله مبرررررررروك ياحلى اخ على المدونة الجميلة واتمنى لكى مزيد من النجاح فيها
اخووك هيرو

غير معرف يقول...

مبروك المدونه ويارب تكون احلي واكبر مدوانه وحتي لو مش بقت كده كفايه انها بتعنك يا احلي عموووور

غير معرف يقول...

عندك حق يا عمور البوس وانت صغير كتير لكن اما تكبر بيقل يمكن عشان الصغير بيبقى دلع واما تكبر بتبقى شاحت مشكورة على الموضوع الهايل يا عمور اختك غرام

lostlove يقول...

اتوبس المووت واللهي معاك حق ههههههههههههههه احنا بنركب الاتوبيس عشان نموت ويجلنا العدوه وبنسبه لموضع البوس الناس لما بنكون صغيرن بيكون الوضع في رفق لاكن لما نكبر بقي هههههههههههههه خلاص خلصت بوس بقي حد من سنك هما مش فضين ليك

amirelhob يقول...

هههههههههه ميرسى بجد على تعليقاتكم الجميله وارئكم اللذيذه ويا رب تفضلوا معانا علطول لانكم بجد احسن ناس عرفتهم وانتوا بجد اللى فى ايدكم تنجحونى وتنجحوا المدونه او عكس كدا
ومن قلبى بجد بتمنكلم كل خير وسعاده وصحه وتوفيق وفرح وابتسامه تدوم يا رب ليكم كلكم طول العمر يا ارق ناس

Ranim Ayman يقول...
أزال المؤلف هذا التعليق.
Ranim Ayman يقول...

هههههههههههههههه ضحكت اوي من اول العنوان لحد اخر حرف هههههههههههه بجد بجد اكتر حاجه عجبااني اختيارك للموضيع بجد تحفه والموضيع تحفه اوي تصدق مكننتش اعرف اني همبسط اوي كده لما ابدأ من الاول \تحياتي مبتسمة دائم