السلطه فى خدمه الشعب



طبعا اسم عجيب وكلكم مستغربين يعني ايه السلطه في خدمه الشعب
ماهي السلطه مفيده جدا للشعب خيار وطماطم وجرجير
والخضروات المفيده دي
بس يا تري هي ديه السلطه الي انا بتكلم عليها ؟
انا بقي بتكلم علي نوع سلطه مختلف جدا
في كوسه وطبيخ وحركات كتير وبما اننا عودناكم علي كشف جميع الحركات وكل الاشتغالات هنقول ونحكي في حال جديد عليكم من احوال الدنيا
اكيد كلنا رحنا نعمل البطاقه الشخصيه
ورحنا القسم وشفنا المنظر هناك ازاي
كله بيمشي بس بشرط
كيش بتاع الكافتريا 5 ولا10 جنيه
عشان يندهلك المسئول الاكبر تقوم مكيشو بي 20 ولا 50 جنيه
* ملحوظه*
كيشو يعني ادفعلو رشوه بس متقولوش لحد اني قلتلكم
نرجع بقي للموضوع الاساسي
احنا ليه مش بناخد موقف من موضوع التكيش ده
يعني عشان يكون عندي اي مشكله في محكمه ولا قسم شرطه لازم ادفع وتتطلع عيني عشان اعرف اخود حقي او اخلص مصلحتي
والمشكله ايه كمان انك لو دفعت ل واحد تلاقي 10 غيرو جولك وادفع بقي يا معلم وعيش
هي ليه الحكومه بتعتنا سلاطه اوي كده
كل بيحب ياكول كله ومفيش حد بيرحم حد
يعني عشان اعرف امشي اموري لازم ادفع لكل امين شرطه يقبلني مهما دول الحكومه الي مسكه البلد
مش ظابط ولا حاجه جامده كده لا يدوب امين شرطه ويتامر عليك ولا كانو وزير الداخليه
ويا سلام بقي لو حظك حلو اوي ورحت تعمل محضر
يبقي هتشوف حركات ولا الافلام
ولا كانك حرامي مش صاحب حق يمكن هناك الحرامي بيتعامل كويس يعني لو دخلت قسم الشرطه مظلوم تخرج ظالم وعليه العوض ومنو العوض
راحت حياتك يا ولده حتي لو تشبه اسماء وغلطه في كمبيوتر الداخليه
بس هنقول ايه القول ضايع في البلد ديه
ومن الاخر طول ما احنا بنسكت ع الغلط عمره ما هيتصلح عشان احنا قبلنا وانا مش بقول كده عشان انا عرفت اعمل حاجه في الغلط ده ولا اعترضت عليه لاسمح الله يعني
دنا كل لما اروح اي مصلحه حكوميه وخده معايه شوال كوسه وافضل افرق بقي عشان مصلحتي تمشي هعمل ايه يعني انا عارفه انو حرام والراشي والمرتشي في النار
بس مفيش حل تاني عندي جربت اعترض مره كله باظ
لازم افرق الكوسه علي الاخوه الموظفين الحكومين بس تحت مصطلح
( خد اشتري موز لحماده)
الهي تتزحلق يا حماده زي ابوك ما مزحلقنا
وخلاص بقي كفايه كده لان الموضوع لو فضلت اتكلم فيها مش هيخلص بس يارب تكون وجهه النظر وصلت
وقولت المفيد عنها
وعشان خاطري ابقو هاتو موز ل حماده

10 التعليقات:

بوسى يقول...

مواضيعك جامده يا شيمو وبجد تستحقى تبقى صحفيه وافضل
من كدا كمان وبجد مواضيعك مالهاش مثيل و فعلا انتى مكسب للمدونه ويمكن انتى كمان اصلا بقيتى المدونه نفسها
وربنا يسعدك يا رب
هههههههههه وبجد اراء حكايه وروح الدعابيه جميله جدا

سلمى يقول...

ميه على ميه يا شيمو بس انا حاسه انك عندك اكتر من كدا رغم ان الموضوع مش ناقصو اى حاجه وانا شخصيا حصل معايا الموقف دا بس ليا سوال بجد غريب ليه بتوع القاهره بس اللى صور بطاقتهم ملونه ؟
وربنا يسعدك يا قمر يا رب

نادر يقول...

تسلبم ايدك يا شيمو على الموضوع دا وبجد فعلا بيطلع عين اللى جابونا فى المصالح الحكوميه بس انتى بقى منين اصلا ؟

نانسى يقول...

استمرى على نفس الناظم عشان كدا بجد والله صح وبجد بتقولى مواضيع حلوه اوى وانا عن نفسى متابعه كل مواضيعك من الاول يا قمر وربنا يسعدك يا اجمل شيمو

بسبوسه يقول...

موضوع جامد وشكلك هتروحى فى داهيه هههههههههههههههههههه
بس يا ريت تقولى كمان على فواتير التفلون والكهرابء وغيرها وكل الحاجات دى عشان احنا بجد نفسنا نشوف حد يعبر عننا

فهد يقول...

ربنا يوفقك يا قمر يا رب ومشكوره على المجهود الرائع

lostlove يقول...

تسلمولي بجد علي الكلام ده الموضع حلو عشان انتم الي بتشوفه سلمي بنسبله لسؤالك مش عارفه دلوقتي بصراحه عشان انا من اسكندريه والبطاقه بتاعتي ابيض واسواد وشكلي فيها اكيد مسجله خطر بس هعرف اشمعنها القاهره كده ولا هي الكوسه حتي في صور الباطايق
وتسلمولي بجد يا جماعه علي الكلام الجميل ده والمدونه جمده بيكم انتم وفعلا رايكم ده بيفرق معايه كتير وبيخلني افكر في حجات اجمد واجمد

بس امانه لو رحت مارينا ابعتولي عيش وحلاوه هناك
هههههههههههه
ومن كل قلبي اتمنه اشوفكم يخير وصحه وسعاده

amirelhob يقول...

مبروك على رد الفعل الجميل دا يا شيمو وبجد تستحقى الكلام الحلو دا كلو وفعلا موضوعك حلو وانا كل يوم بتاع رد فعل الناس الجميله على موضوعك دا وبجد فعلا قدرتى تثبتى وجودك فى المدونه احسن منى ومش عيب انى اقول كدا وبجد تستحقى الاحترام وانى ارفع ليكى القبعه احتراما
وبعتذر لكل الناس اللى مكنتش برد على ايميلاتهم وزلا برد على تعلقياتهم لانى بجد فى حال لا احسد عليها
ومن قلبى بجد بتمنلكم كل خير وسعاده وصحه وتوفيق وفرح وابتسامه تدوم يا رب طول العمر

lostlove يقول...

تسلم يا عمور بس مهما عملت مش هقدر اتفوق عليك
وشكرا بجد ليك وليهم وكلامكم ده بيخلني بجد سعيده
وبفضل ادور علي طول ع الاحسن والاحسن ده منكم وليكم يا احلي واروع ناس
ويارب اشوفكم علي طول بخير وفرحه وهنا

basel يقول...

modo3 yagann ya shimo wlah anan 3mal ad7ak men awel ma 2reto tslam eidak 3la el moade3 el7lwa dy